Terme en Voorwaardes — Persoonlike Video Boodskap

Hierdie voorwaardes geld net vir 'n Persoonlike Video Boodskap. deBende Lid het sy eie voorwaardes. Ons hou dit eenvoudig en menslik.

Laas opgedateer: 8 September 2026

1. Wie ons is

Die video word aangebied deur De Bende (Pty) Ltd (handeldrywend as 'deBende'), registrasienommer 2021/390322/07, BTW-nommer 4400314904. Kontak: info@debende.co.za  ·  068 624 3193.

2. Wat jy koop

'n Video wat Riaan Benadé self opneem, spesiaal vir jou of vir iemand na aan jou. Gewoonlik 30 tot 60 sekondes. Ons stuur dit op WhatsApp na die nommer wat jy op die vorm invul.

Dis 'n persoonlike boodskap — 'n verjaarsdag, 'n gelukwensing, 'n bemoediging, 'n dankie. Dit is nie 'n advertensie, 'n onderskrywing of 'n bemarkingsdiens nie.

3. Prys en betaling

R500, BTW ingesluit. Een betaling, geen intekening, niks word later weer afgetrek nie.

Betalings word hanteer deur Payfast, 'n geregistreerde Suid-Afrikaanse betaaldiens. Ons sien en stoor nooit jou kaartbesonderhede nie. As geregistreerde BTW-onderneming stuur ons vir jou 'n belastingfaktuur per e-pos sodra die betaling deur is.

Jou versoek kom eers by Riaan sodra die betaling bevestig is.

4. Wat Riaan nie sal doen nie

Riaan neem nie 'n video op wat enige van die volgende bevat nie:

• seksuele of suggestiewe inhoud
• skeldname, haatspraak, of kru vloek wat op 'n persoon gemik is
• dreigemente, intimidasie, of 'n boodskap wat bedoel is om iemand te verneder of seer te maak
• 'n politieke party, kandidaat, veldtog of stemversoek
• dobbel-, krypto-, beleggings- of geldskema-inhoud
• die naboots van iemand anders se stem, karakter of identiteit
• nuus wat nie joune is om te deel nie — byvoorbeeld 'n siekte, 'n dood, 'n swangerskap of 'n verlowing namens iemand anders
• mediese, regs- of finansiële advies
• 'n boodskap aan iemand wat dit nie wil ontvang nie
• iemand anders se private inligting

Vra jou versoek vir enigiets op hierdie lys, geld die admin-fooi in punt 6.

En laastens: as 'n versoek eenvoudig nie reg voel nie, al staan dit nie hier bo nie, doen Riaan dit nie. Dis sy oordeel en ons hou daarby — maar dan is dit ons kant, en jy kry elke sent terug.

5. Geen advertensies of bemarking nie

Hierdie video is vir 'n geliefde of vir jouself, nie vir 'n besigheid nie.

Riaan maak nie 'n video wat 'n besigheid, produk, diens, handelsmerk, app, kanaal, geleentheid, veldtog of belegging bemark, bekendstel, aanbeveel of bevorder nie. Dit sluit in:

• 'n boodskap wat 'n besigheid, handelsmerk of logo moet noem
• 'n 'shout-out' vir 'n bladsy, winkel, kanaal of onderneming
• 'n video wat by 'n funksie, konferensie of vir personeel namens 'n maatskappy gewys word
• 'n video wat op 'n besigheid se sosiale media, in advertensies of in enige promosiemateriaal gebruik gaan word
• 'n video wat mense moet oorreed om iets te koop, te teken, af te laai of in te belê

Koop jy tog 'n video vir advertensie- of bemarkingsdoeleindes, doen ons dit nie, en die admin-fooi in punt 6 geld.

Gebruik jy 'n persoonlike video later tog vir advertensies of enige bemarking, moet jy dit dadelik verwyder sodra ons vra. Dit verbreek hierdie voorwaardes en ons kopiereg, en ons betaal in daardie geval niks terug nie.

Soek jy 'n borgskap, 'n verskyning, 'n onderskrywing of 'n vertoning, is dit 'n heel ander diens teen 'n heel ander prys. Skryf gerus aan info@debende.co.za — maar dit gebeur nooit deur hierdie R500-video nie.

6. As jou versoek nie deurkom nie — die 20% admin-fooi

Punt 4 en punt 5 sê duidelik wat Riaan nie sal doen nie. Daardie lys staan op hierdie bladsy, en dit staan op die bestelvorm waar jy jou versoek intik. Jy merk self aan dat jy dit gelees het voor jy betaal.

Daardie fooi dek die betalingsfooi wat ons reeds betaal het en wat nie met 'n terugbetaling terugkom nie, plus die tyd om die versoek te lees en te hanteer. Dis nie 'n boete nie, en dis nie 'n verrassing nie — jy het dit self aangemerk.

Wanneer kry jy elke sent terug? Wanneer dit ons kant is, nie joune nie:

• as Riaan 'n versoek om sy eie redes nie wil doen nie, en dit staan nie op die lys nie
• as ons dit nie binne 2 werksdae by jou kry nie
• as ons om enige ander rede nie kan lewer nie

In daardie gevalle hou ons niks terug nie, en jy hoef nie eers te vra nie.

7. Wat jy met die video mag doen

Die video is vir jou persoonlike gebruik. Jy mag dit hou, dit vir familie en vriende stuur, en dit op jou eie persoonlike sosiale media plaas.

Jy mag dit nie verkoop, in advertensies gebruik, op 'n besigheid se rekening plaas, of so verander dat die betekenis anders is nie. Die kopiereg bly by De Bende (Pty) Ltd.

8. Aflewering, en wanneer jy alles terugkry

Ons stuur die video binne 2 werksdae nadat jou betaling deurgegaan het, op WhatsApp na die nommer wat jy ingevul het. Naweke en publieke vakansiedae tel nie saam nie.

Kry jy dit nie binne 2 werksdae nie, betaal ons jou volle R500 terug — jy hoef nie eers te vra nie. Dieselfde as Riaan die versoek om enige rede nie kan doen nie, behalwe die gevalle in punt 6.

Vul jy die verkeerde selfoonnommer in, laat weet ons jou per e-pos. 'n Vertraging wat daaruit kom, is nie ons kant nie — maar sê net vir ons, en ons stuur dit oor.

Terugbetalings gaan binne 15 werksdae terug na dieselfde metode waarmee jy betaal het.

9. Kansellasie

Voor Riaan dit opgeneem het: kanselleer enige tyd en kry jou volle R500 terug. Stuur net 'n e-pos na info@debende.co.za.

Nadat dit opgeneem is: die video is spesiaal vir jou gemaak en kan vir niemand anders gebruik word nie, so ons kan dit nie terugbetaal nie.

Niks hierin beperk jou regte onder die Verbruikerswet nie.

10. Jou inligting

Ons gebruik jou naam, selfoonnommer, e-posadres en jou versoek net om die video te maak en aan jou te stuur, en om jou faktuur uit te reik. Ons verkoop dit aan niemand nie. Sien ons privaatheidsbeleid vir die volle prentjie.

11. Aanspreeklikheid

Ons doen ons bes om elke video reg en betyds te lewer. Ons is nie aanspreeklik vir indirekte verliese nie, en ons aanspreeklikheid is in elk geval beperk tot die R500 wat jy betaal het. Niks hierin beperk jou regte onder die Verbruikerswet nie.

12. Veranderinge

Ons kan hierdie voorwaardes opdateer. Die weergawe wat geld, is die een wat op die dag van jou bestelling op hierdie bladsy gestaan het.

13. Toepaslike reg

Hierdie voorwaardes word beheer deur die reg van die Republiek van Suid-Afrika.

14. Kontak

Enige vraag? Skryf gerus aan info@debende.co.za of skakel ons by 068 624 3193.